Isto é un blog de viaxes!! Si, un blog onde se amosen as nosas experiencias por Melide, por Galicia e polo mundo adiante...pola contorna.
Queremos propoñer visitas, saídas, camiñadas.... QUEREMOS VIAXAR MÁIS!!
Este espazo pretende dar ideas para esas tardes de Sábado e Domingo nas que non se nos ocorren moitas cousas que facer. Xorde coa intención de coñecer por riba de todo o patrimonio histórico e natural do noso arredor: Melide e comarca, Galicia e o mundo. Non nos chega o espazo da nosa casa para experimentar e estamos desexando aprender cousas novas da nosa contorna.
As entradas no blog podémolas escribir calquera que formemos parte da Comunidade Educativa do IES de Melide, así que, Ánimo! Queremos saber das vosas viaxes e experiencias, queremos que as compartades con todos e todas, así, dádesnos ideas para as nosas próximas viaxes.
A partir de agora, cada vez que vaiades de excursión , levade a cámara, facede fotos e se queredes, escribide un post contando todo o que vistes. Se algunha persoa se anima pode investigar un pouco nos libros sobre a zona, os edificios, etc. e engadilo ao seu comentario de viaxe e así iremos aprendendo moitas cousas.
E para todo aquel/a que visite a noso blog, sabede que podedes deixar apontamentos de viaxe ou comentarios sen límite. Corrixídenos, animádenos, comentade as vosas vivencias nos sitios que visitamos. Completade información e dade outras ideas de que lugares visitar, que comer ou que levar de recordo. O que se vos ocorra, vamos!
Así pois, collede as mochilas, un mapa, algo de beber, os prismáticos, unha lanterna e a cámara de fotos . Comeza a camiñada e esperámosvos a todos e a todas. Isto é nada máis que o principio da viaxe, o Kilómetro 0. A camiñada máis longa comeza cun paso.
